|
Diuendres, 27 de Gèr de 2012 |
|
Es organizadors dera 33au Edicion de la MARXA Beret que se celebrarà eth pròplèu dimenge 5 de hereuèr, mos comuniquen qu’eth nombre de marchadors inscrits a trauèrs d’Internet contunhe a bon ritme.
Eth director dera MARXA BERET e conselhèr d’Espòrts deth Conselh Generau d’Aran, Marcos Viló, explicave ager qu’eth nombre d’inscrits via Internet aumente cada dia, sustot per part d’aqueri marchadors que oficializen era sua participacion des der estrangèr, degut ara inclusion enguan dera MARXA Beret en circuït europèu Eurolopett, qu’a desvelhat er interès de marchadors russi, austrians, noruecs e tanben de corredors des Estats Units de Nòrd-America. Totun açò, Viló volèc rebrembar qu’eth periòde d’inscripcions per Internet finalize eth pròplèu dimèrcles, dia 1 de hereuèr.
En çò que tanh as trabalhs d’organizacion dera MARXA Beret, es Volontaris d’Aran ja hè dus mesi que trabalhen enes preparatius des tasques que les son encomanades. Es volontaris collaboren damb era organizacion des der an 2007, e son es encargats de premanir es bosses que se balhen as participants enes que s’includís eth dorsau de participacion atau coma eth chip que permet ath finau dera MARXA cronometrar eth temps de cada marchador. Es mès de 70 volontaris s’ocupen, ath delà, deth servici d’avitualhament (aliment solid e liquid) que se da as participants pendent era MARXA, e tanben curbissen es lòcs de pas pendent era carrèra. Era implicacion ena MARXA Beret des volontaris, qu’ei totaument altruïsta, curbís tanben es besonhs der esprint Salomon que s’amie a tèrme eth dia 2 de hereuèr, dissabte, e era atencion as participants ena gessuda e ena arribada dera MARXA Beret.
Er estat dera nhèu e es condicions climatologiques en Baqueira Beret, hè a pensar qu’era 33aua Edicion der MARXA Beret, serà ua des mès exitoses des darrèrs ans.
|
|
Diuendres, 27 de Gèr de 2012 |
|
Eth Conselh Generau d’Aran, per miei dera Escòla de Tecnics Esportius dera Val d’Aran (ETEVA), aufrís un cors d’Atencion Sociosanitària deth dia 23 de gèr enquiath mes de junh en er aula dera Residéncia d’avis de Vielha.
Eth cors ei dubèrt entà toti es interessadi, non sonque entàs persones que ja an corsat formacion d’atencion sociosanitària, pr’amor qu’er objectiu ei balhar responsa ath sector qu’a de besonh de persones qualificades e coneishedores deth sector, atau coma integrar as joeni laguens deth mercat laborau.
Aguest cors comènce damb ua prumèra unitat formativa deth cors que se desvoluparà entre eth 23 de gèr e eth 29 de hereuèr, de 16 a 19 ores. Era formacion contunharà damb autes unitats formatives enes que tanben calerà inscriuer-se. Es alumnes qu’ inicien eth cors auran era prioritat d’inscripcion ena rèsta d’unitats.
Un viatge finalizades totes es unitats, que se desvoluparan enquiath mes de junh e pendent eth pròplèu cors escolar en què tanben s’an de realizar es practiques, s’obtierà eth corresponent certificat de professionalitat, encara que se certificarà tanben cadun des unitats formatives enes qu’agen participat.
Aguest cors ei gratuït subvencionat peth Servici d’Aucupacion de Catalunya (SOC) e eth Hons Sociau Europèu e ja s’i an inscrit més de 40 persones.
Tà mès informacion, se pòt trucar entath 973 64 45 95 o consultar era adreça www.eteva.org. |
|
|
Diuendres, 27 de Gèr de 2012 |
|
Ena darrèra reünion dera Comission de Patrimòni deth Conselh Generau d’Aran e, entre d’auti tèmes, se prepausèc dotar d’illuminacion exteriora era Tor deth Generau Martinhon, actuau sedença deth Musèu dera Val d’Aran. Er edifi ei catalogat coma BCIN (Ben Culturau d’Interès Nacionau). Damb aguesta actuacion non sonque s’artenherà mielhorar era preséncia der edifici, senon que tanben li darà ua mielhor preséncia ath carrèr Major dera ciutat de Vielha.
Un aute des aspèctes vinculats a Patrimòni que sigueren tractats ena reünion, hè referéncia ara restitucion dera hièstra gotica de Santa Maria d’Arties, que tanben ei catalogada coma BCIN. En aguest cas se tracte de reconstruïr aguesta hièstra en tot escuélher coma modèl es hièstres gotiques de Salardú e Betren. Damb quaques pèces que se consèrven deth rosseton originau, se harà era reconstruccion entara quau s’a demanat assessorament ath tecnic de Patrimòni dera Generalita de Catalunya, Xavier Sierra.
S’acordèc tanben hèr ua actuacion ena capçalera dera glèisa de Sant Julià de Garòs, entà apariar eth passadís que comunique era glèisa damb eth Comunidor, pr’amor qu’ei lord e s’a de limpiar. Ena madeisha reünion se dèc eth visteplatz entara restauracion dera imatge dera Pietat qu’actuauments ei depositada en Musèu dera Val d’Aran. Era actuació se harà en Centre de Restauracion de Bens Mobles dera Generalitat de Catalunya en Valldoreix.
Eth cap de Cultura e Patrimòni deth Conselh Generau d’Aran, Jèp de Montoya, informèc pendent era reünion dera restauracion que s’a amiat a tèrme dera creu processionau d’Aubèrt, a cargue dera orfebre Montserrat Cañís, qu’a hèt ua actuacion molt acurada de restitucion de claus, a restaurat er anima de noguèr der interior dera creu e a pulit i limpiat totes es pèces de metau. Un còp montada de nau, demoram restituïr era creu ena glèisa d’Aubèrt eth pròplèu mes de març, en tot coïncidir damb es 400 ans dera sua construccion.
Finauments, e a prepausa der Ajuntament de Vielha e Mijaran, lèu se convocarà a toti es alcaldes e tecnics des ajuntaments dera Val d’Aran, entà establir e unificar es critèris de conservacion e d’ordenacion des nuclèus antics des poblacions der Aran, deuant dera proliferacion d’installacions de terrasses enes centres istorics des nuclèus urbans.
|
|
|
Diuendres, 27 de Gèr de 2012 |
|
Era corsa de muishing Pirena Gran Prèmi Advance arribe ath Plan de Beret. Aguesta corsa, que hè més de de 20 ans que se desvolope, ei puntuable enes Copes d’Euròpa e deth món e trauèsse es Pirenèus d’oest a est.
Era conselhèra de Torisme deth Conselh Generau d’Aran, Anna Díaz, assistic ara etapa nocturna, Beret- Montgarri, que guanhèc er alemanh Tom Andrés. |
|
|
Dijaus, 26 de Gèr de 2012 |
|
Era conselhèra de Torisme, Comèrç e Consum deth Conselh Generau d’Aran, Anna Diaz presentèc ua demana ath Conselh d’Administracion ena quau se daue compde deth besonh de balhar eth contracte entara prestacion des servicis de Desvolopament d’aplicacions entà telefons mòbils intelligents (smartphones) deth producte toristic “Val d’Aran, esséncia des Pirenèus”. Aguesta demana s’aprovèc eth passat dia 23 de gèr en Conselh de Govèrn per unanimitat.
Era finalitat ei de dotar eth territòri des recorsi e des ensturments de besonh entà auferir un producte toristic de qualitat, competitiu e sostenible, en tot incidir atau de forma positiva en desvolopament locau.
Es objectius deth projècte son:
-Increment dera qualitat des servicis toristics dera destinacion
-Metuda en valor des recorsi toristics.
-Sensibilizacion e implicacion dera poblacion e des agents locaus en ua cultura de qualitat.
-Facilitar era informacion d’aquerò qu’era Val d’Aran pòt auferir as sòns visitants.
-Promocionar eth territòri mejançant eth pròpri visitant e es hilats sociaus.
-Auferir era possibilitat d’auer tota era informacion dera Val d’Aran actualizada ena pòcha e damb era possibilitat de consulta en quinsevolh moment.
-Dar as empresaris deth país un ensturment que les ajudes a èster mès competitius.
-Dar ara Val d’Aran un plus de qualitat e servici toristic.
|
|
|
Dijaus, 26 de Gèr de 2012 |
|
Eth Conselh Generau d’Aran a finalizat es òbres deth guadadèr de Beret coma “un nau atractiu toristic, pr’amor que des d’aguest punt a 1770-1775m de nautada i an ues vistes extraordinàries dera Val d’Aran, Aneto, Montarto, Colomèrs,...” a manifestat era conselhèra de Torisme, Anna Díaz.
Eth guardadèr, plaçat ena carretèra C-142- p.k 4.800 en Naut Aran, ei pera sua situacion un lòc fòrça transitat entà accedir as pistes d’esquí deth Plan de Beret, ath pòble de Montgarri, ath neishement der arriu Garona,... abantes dera existéncia d’aguest guardadèr, fòrça gent paraue eth coche entà gaudir des vistes e açò comportaue un risc per éster ua corba damb pòc trepader.
Es òbres s’inicièren eth passat mes de seteme deth 2011 e an durat 3 mèsi, damb un impòrt de 48.000€.
|
|
|
Dimèrcles, 25 de Gèr de 2012 |
|
Agèr dia 24 de gèr, se celebrèc un Plen extraordinari,entà debàter era mocion presentada peth Grop Unitat d’Aran-PSC en contra dera implementacion dera taxa toristica que vò impulsar eth Govèrn dera Generalitat de Catalunya, prevista ena Lei d’acompanhament des Pressupòsti entar an 2012.
Eth sindic d’Aran, Carlos Barrera, a declarat que “eth sector empresariau toristic dera Val d’Aran, a demostrat pendent ans era sua professionalitat, competitivitat e qualitat que, amassa damb eth patrimòni naturau e culturau, hèn dera Val d’Aran ua destinacion toristica de prestigi”.
Barrera a hijut: “ Perque quan Unitat d’Aran-PSC e PRAG, governaven eth Conselh Generau d’Aran, eth Tripartit en Govèrn dera Generalitat e eth PSOE en Govèrn Centrau, UA-PSC, non convoquèc cap Plen extraordinari entà debàter er impòst sus es carburants dera conselhèra Marina Geli, entàth finançament dera sanitat catalana, o era reduccion deth 5% deth salari as foncionaris?”
En abséncia de Francés Boya a estat Juan Antonio Serrano, er encargat de defensar era mocion presentada peth sòn grop, en tot explicar qu’eth sector otelèr dera Val d’Aran a hèt un gran esfòrç, en çò que tanh ara contencion de prètzi, e qu’era naua taxa vierà a penalizar era competitivitat d’ues empreses que dejà estan ath limit dera sua rentabilitat. Ua taxa, segontes Serrano, que sonque pagaràn es empresaris deth sector otelèr e non toti aqueri establiments comerciaus que se beneficien des ingressi toristics.
Eth sindic d’Aran, Carlos Barrera, en son torn, a explicat que des deth Govèrn deth Conselh Generau d’Aran, se trabalharà en dus aspèctes claus en quant ara implantacion per part deth Govèrn dera Generalitat d’aguesta taxa toristica, prumèr, qu’ei ua taxa d’aplicacion en tot Catalunya e non pas d’esperit territoriau ne municipalista, e segon que s’a de seguir damb atencion eth sòn desvolopament, pr’amor que Catalunya ei eth prumèr destin toristic d’Espanha, e cau contunhar mantenint era competitivitat d’un sector fòrt e ben posicionat.
|
|
Liéger mès...
|
|
|
Diuendres, 20 de Gèr de 2012 |
|
Ei eth prumèr còp qu’era Aviacion Civila autorize ua activitat d’aguestes caracteristiques en Estat espanhòl.
Ager dijaus eth sindic d’Aran, Carlos Barrera, acompanhat des responsables des empreses TAF Helicòpters e Pyrenees Heliskí, presentèc en roda de premsa era autorizacion entara practica der elisquí ena Val d’Aran, per part d’Aviacion Civila.
Barrera expliquèc qu’era practica der elisquí ena Val d’Aran comencèc perque i auie ua demana deth mercat, e qu’açò comportèc que des de TAF Helicòpters se possèssen a trabalhar entà obtier era sua regularizacion. Aguesta ei era prumèra, e de moment unica autoritzacion entar elisquí de tota Espanha, çò que segontes eth sindic d’Aran, convertís era Val d’Aran en un destin toristic exclusiu en tot er Estat, damb un producte de qualitat qu’amplie era aufèrta deth país, un des objectius de Torisme Val d’Aran.
TAF Helicòpters ei ua empresa que des der an 1959 opere elicoptèrs, e ei especializada sustot en trabalhs de montanha, en tot dar assisténcia a granes empreses coma Endesa o Baqueira Beret, e que tanben collabore damb era Generalitat de Catalunya en rescats de persones en montanha.
Joan Carol, director de desvolopament e estrategia corporativa de TAF Helicòpters, expliquèc que trabalhen des de quate èishi basics que son: era qualitat, era seguretat, eth respècte peth mie ambient e era sostenibilitat economica. Entà Carol aguesti èishi an de hèr qu’era practica der elisquí ena Val d’Aran, perdure en temps.
Pera sua part, Sergi Gasa, responsable de Pyrenees Heliskí, remerquèc qu’era Val d’Aran reünís es caracteristiques idonèes entara practica der elisquí, iguau que d’autes destinacions coma es Alps, Turquia o Canadà, damb era diferéncia qu’en Aran i a molta mès aufèrta complementària d’après-skí qu’encara ac hè mès atractiu.
|
|
Liéger mès...
|
|
|
.jpg)
.jpg)
.jpg)
.jpg)
.jpg)
.jpg)
.jpg)
.gif)
